Ssenarinin təkmilləşdirilməsi kursu
Ssenarinin təkmilləşdirilməsi kursu – qısametrajlı film və animasiya ssenarilərinin ən yüksək keyfiyyətə çatdırılması ilə yanaşı, müəllifə lazım olan əsas ssenari biliklərinin öyrədildiyi xüsusi bir proqramdır. Bu kurs, ssenarisini təkmilləşdirməkdə çətinlik çəkən, onu daha mükəmməl səviyyəyə çatdırmaq istəyən ssenaristlər (həmçinin, ssenari yazan rejissorlar, prodüserlər və yazıçılar) üçün nəzərdə tutulub.
Kursun strukturu və məqsədi
Kurs çərçivəsində iştirakçılar özlərinin qısametrajlı ssenariləri üzərində işləyir, onların strukturundakı problemləri təhlil edir və yaradıcı həll yollarını öyrənirlər. Kurs, iştirakçının ssenarisinə fokuslanaraq onun mövcud potensialını üzə çıxarmağı hədəfləyir. İştirakçı kursu hazır və peşəkar formada tamamlanmış ssenari ilə bitirir.
Kursun unikal tərəfi ondadır ki, ssenarini iştirakçı özü redaktə edir. Bunun üçünsə lazım olan ssenari elementlərini öyrənir, ssenarinin niyə məhz o cür işlənilməsi ilə bağlı biliklər əldə edir və mentorun nəzarəti ilə ssenarisini təkmilləşdirir.
Bu proqram niyə kurs adlanır?
Burada iştirakçılar ssenarilərini təkmilləşdirmək üçün aktiv şəkildə öyrənir və ssenarilərinə uyğun olaraq praktik tapşırıqlar yerinə yetirirlər. Hər bir ssenariyə baxış zamanı müəllifin ssenari bilik səviyyəsi, nəyi bildiyi və hansı çatışmazlıqlarının olduğu barədə aydın təsəvvür yaranır. Bu çatışmazlıqları aradan qaldırmaq üçün bilik və praktik çalışmalar tətbiq edilir.
Məsələn, iştirakçının yazdığı səhnələr emosional dəyişikliklərdən məhrum, struktursuz və ya bəsit ola bilər. Bu vəziyyətdə onun səhnə yazımını gücləndirmək üçün xüsusi "səhnə yazımı" dərsləri təşkil olunur. Dərs çərçivəsində səhnələrin strukturu, müxtəlif qatları, bədii həlləri, emosional dəyişikliklər və s. öyrədilir. İştirakçı səhnəyə aid praktiki çalışmalar edir, səhnələr yazır, səhnələr oxuyur və analiz edir. Həmçinin, yoldaşlarının səhnələrinə geri dönüşlər verir. Nəticədə, "səhnə yazımı" ilə bağlı bilikləri mənimsəyir və həmin bilikləri ssenarisinə tətbiq edərək onu daha təsirli və peşəkar səviyyəyə çatdırır.
İştirakçıların bir-birilərinin ssenarilərinə geri dönüşlər etməsi onların həm analiz, həm də obyektiv qiymətləndirmə bacarıqlarını inkişaf etdirir. Bu, iştirakçıların yalnız öz işlərini deyil, ümumilikdə ssenari yazımı prosesini daha dərindən anlamağına və yaradıcılıq təcrübələrini zənginləşdirməsinə imkan yaradır.
Kursun detalları
- Dərslər həftədə iki dəfə olmaqla (3-3,5 saat) əyani formada keçirilir.
- Dərslər onlayn platforma (https://www.kurs.parvizmammadov.com) vasitəsilə dəstəklənir.
- Kursun müddəti: 3 ay
- Ödəniş: aylıq 400 AZN
Kurs müddətində bir qısametrajlı ssenari işlənir.
Bu kurs, yaradıcılıq potensialınızı artırmaq, ssenarinizi məhz özünüzün ən yüksək keyfiyyətə çatdırmaq və hekayənizi təsirli bir formada təqdim etmək üçün unikal bir fürsətdir.
