Pərviz Məmmədov

Pərviz Məmmədov

Mən, Pərviz Məmmədov, 18 dekabr 1984-cü ildə Bakı şəhərində anadan olmuşam. 2007-ci ildə Azərbaycan Texniki Universitetinin Mühəndis biznesi və menecment fakültəsini bitirmişəm. Buna baxmayaraq, mənim əsas maraq və yaradıcılıq sahəm ssenari yazmaq olmuş və peşəkar həyatımda bu istiqamətə yönəlmişəm.

Karyera

Ssenari sahəsinə tam keçid etməzdən əvvəl 6 il İT administratoru olaraq çalışmışam. Bu müddət ərzində analitik düşünmə, strukturlaşdırma və problem həll etmə bacarıqlarımı təkmilləşdirmişəm. Bu qabiliyyətlər sonradan ssenari yazarlığında mənə əvəzsiz dəstək olub və mənim bu peşədə üstünlüyümə çevrilib. 

Ssenarist, skript doktor və təlimçi kimi fəaliyyət göstərirəm. Ssenari yazmaq, analiz etmək, ssenariyə aid yeni biliklər öyrənmək və öyrətmək hər zaman zövq aldığım işlərdir. 

Fəaliyyət sahələrim:

• Ssenarilərin yazılması və skript doktorluq

• Ssenari təlimləri və kurslar

• Film və serial analizləri

• Film və serial üçün konsultasiya və yol xəritələri

Fəaliyyət sahəmə parallel olaraq 4 il (2018-2022) teatr sahəsində çalışmışam və dOM teatrının (təsisçi və bədii rəhbər Tərlan Rəsulov) üzvü olmuşam. Teatrda çalışdığım müddətdə aktyor, rejissor assistenti və rejissor olaraq fəaliyyət göstərmişəm.

Təqdim etdiyim xidmətlərlə daha ətraflı buradan tanış ola bilərsiniz.

Kimlik və yanaşma tərzi

Mən analitik şəxsiyyət tipinə (INTJ) sahib, mükəmməlçi biriyəm. Bu, məni həm dərin düşünən, həm də strateji yanaşan bir yaradıcı edir və işimdə hər bir detalı mənim üçün önəmli edir. Analitik düşüncə tərzim ssenarilərin strukturunu təhlil etməkdə, boşluqları aradan qaldırmaqda və hər bir ideyanı konkret, təsirli formada təqdim etməkdə mənə böyük üstünlük qazandırır. Ssenaridə bir remarkın belə yerində olmaması məndə narahatlıq yaradır, çünki hər bir elementin – təsvir cümləsinin düzgün quruluşundan süjet xəttinə qədər – peşəkar ssenarinin formalaşmasında vacib rolu var. Bu elementlərin hər birini nəzərə almaq və onları harmonik şəkildə təmin etmək isə mənim əsas vəzifəmdir.

Mükəmməlçi yanaşmam işlərimdə həm keyfiyyəti, həm də peşəkarlığı təmin edir və nəticədə, yaradılan əsər hər zaman ən yaxşı forması ilə təqdim olunur. Mənim üçün hər replika, hər cümlə mükəmməl olmalıdır, çünki inanıram ki, hər bir işin, hər bir ssenarinin həmişə daha yaxşı olmaq imkanı var. Bu yanaşmam yalnız yazı prosesində deyil, həm də yaradıcılıq və təkmilləşmə üçün həyat fəlsəfəmə çevrilib.

Yaradanın doğuşdan mənə verdiyi bu xüsusiyyətlər yalnız ssenari yazımında və təhlilində deyil, həm də təlimçilik fəaliyyətimdə öz əksini tapır. Tələbələrimin ssenari elementlərini daha dərindən anlamaları mənim üçün prioritetdir. Onların hər bir elementə ciddi yanaşmalarını, bu peşənin təsəvvür edildiyindən daha dərin olduğunu və uğur üçün yüksək səviyyədə zəhmət və detallara diqqət tələb etdiyini anlamalarını təmin etmək üçün çalışıram. Bu yanaşma ilə tələbələrə yalnız texniki biliklər ötürmürəm, həm də onların yaradıcılıq potensiallarını artırmağa və bu sahəyə dərin hörmət formalaşdırmağa səy göstərirəm.

Təhsil

Yaradıcılıq sahəsində əldə etdiyim uğurların təməlində aldığım təhsil, çalışqanlıq və daim yeni biliklərə yiyələnmək istəyi dayanır. Azərbaycanda ssenari kursları mövcud olmadığı bir dövrdə, Moskvada öz hesabıma iki dəfə ssenari kursu bitirərək bu sahədə dərin akademik biliklər qazandım. Bu biliklər təkcə nəzəri baza yaratmaqla kifayətlənməyib, praktiki yaradıcılıq proseslərimdə də dərin iz buraxıb. Yaradanın mənə bəxş etdiyi və illər ərzində inkişaf etdirdiyim analitik düşüncə, problem həll etmə və sistemli yanaşma bacarıqları ssenari yazımı və təhlilində möhkəm təməl rolunu oynayır.

Mükəmməlçi təbiətim mənim üçün öyrənməyi bitməz bir prosesə çevirib. Hər bir yeni layihə mənim üçün həm yaradıcılıq meydanı, həm də öyrənmək üçün yeni bir fürsətdir. Hər bir detalı dərindən öyrənməyə və daima özümü təkmilləşdirməyə yönəlmiş həvəsim, yalnız peşəkar inkişafımı deyil, şəxsi dünyagörüşümü də zənginləşdirib. Qazandığım bilik və təcrübəni yalnız öz işlərimdə tətbiq etməklə kifayətlənmir, həm də onları ssenari sahəsində olmaq istəyənlərlə paylaşaraq onların yaradıcılıq yolunu asanlaşdırmağa və yeni nəsil ssenaristləri təşviq etməyə çalışıram.

Kurs və təlimlər:

• 2011-2012 – Əli İsa Cabbarovun “Prodüserlik kursu”, Bakı Film İnstitutu

• 2016 – Aleksandr Mittanın “Ssenari ustalığı” kursu, Moskva

• 2017 – Oleq Sirotkinin “Tammetrajlı film ssenarisi kursu”, Moskva

• 2017 – İngiltərəli ssenarist Pol Freyzerin seminarı

• 2020 – Coursera.org platformasında “Film və ya televiziya üçün tammetrajlı ssenarinin yazılması” kursu (Təlimçi: Miçiqan Dövlət Universitetinin müəllimi David Wheeler)